【擔心搵工「空窗期」問題？無問題喇！】
香港人出名勤力如牛，正常情況都係工駁工，話晒手停口停吖嘛！不過咁都有樣好，轉工嘅時候無「空窗期」，唔使怕HR會問長問短。但係如果因為某啲原因，真係喺職場空白咗一段時間，到第日見工時HR又問到，可以點解釋而不失霸氣呢？
寫CV同化妝一樣，最緊要隱藏缺點放大優點，蒙豬眼都變bling bling眼，想美化「空窗期」其實都有計嘅！
1. 太耐嘅就由得佢
當你有返咁上下工作經驗，CV就唔需要寫到水蛇春咁長，主力寫返最近同埋最相關嘅經驗就夠。所以如果「空窗期」係好耐之前發生，你直情提都唔使提都得喇！
2. 識寫一定唔寫月份
除咗「空窗期」外，寫CV時另一個擔心問題就係份工得幾個月貨仔。只要喺CV上面刪減月份，例如有份工由2018年10月至2019年2月，做得短短四個月，但寫成2018年至2019年，係咪立即睇落順眼好多呢？
3. 靠Design同排位技術
呢個就關乎閣下審美眼光同編排能力，例如考慮用多啲文字簡介，或者用其他呈現形式，令到「空窗期」變得無咁明顯。
4. 直接交代原因吧
「空窗期」就等於缺點？只係你心魔作怪，先入為主認為代表「一直無公司請」、「喺屋企唔搵工」！只要你識得包裝，「空窗期」都可以變成優點。例如因為照顧屋企人、去讀書進修、身體養病、working holiday/長途旅行而產生「空窗期」，以上嘅原因亦會塑造你為一個Caring、處事獨立、上進好學嘅好員工！
其實HR見到有「空窗期」，好多時都係循例問句原因，睇吓你有無做準備點答。何況依家咁嘅經濟環境，就算「空窗期」超過半年，都唔係乜嘢大問題。都係個句，只要你「空窗期」期間搵啲世藝，首選讀書進修學新嘢，充實自己之餘，Interview時又可以有個得體解釋，真係一舉兩得㗎！
Search